هم وغم .... حيرة وتعجب

تحديث
ارتفع عد الضحايا الي 35 شهيد
رحمنا الله ورحمهم

لا اله الا الله محمد رسول الله

.........

منه لله المفتري

.......

آآآآآآآآآآآآآآه يابني
حبه عيني يا حبيبي

..........

ياما فينك ياما
ردي عليا ياما

.......

دي اصوات وانفعالات الناس
وانا واقف مزهول من الموقف والدمعه فرت من عيني
12 دور كامل متساوين بالارض
لا حول ولا قوه الا بالله
عماره لوران اللي بقيت زي العجينه
الناس صحيت الصبح علي صوت صوت ايه علي صوتهم وهما بيصرخوا
العماره تتهاوي بيهم من السماء للارض كله فوق بعضه
كلها بقت عجينه منقذ في مكان الحادث

الناس اقارب سكان العماره واقفين منهارين
الجيران مش مصدقين اللي حصل
الامن المركزي واقف محاصر المكان عشان يمنع دخول الاهالي للانقاذ
لدرجه انهم جابوا فرق من الجيش عشان يسيطروا علي الموقف
فرق الانقاذ بتستهبل
مش عارفه شغلها
ولا مش متعوده علي معالجه الكوارث
الناس عايزه تطلع المدفونين بالحيا تحت الانقاض

المحافظ هنا
مدير الامن هناك
اعضاء مجلس العشب ها هنا
اسعاف وانقاذ ومطافي في كل حته
الناس في كل مكان


منه لله المفتري صاحب العماره مرخصها 6 يبنيها 12
كام قرار ازاله وترميم وكله بيخلص بالفلوس
كام عماره وبيت في اسكندريه نفس الشكل
انا بيتي القيدم قبل ما انقل مكان سكني كان متهالك والان يتهاوي ايضا
مناطق كامله مبنيه من غير تراخيص ومعموله اي كلام
كام بيت في اسكندريه بيقع وينهار من المطر في كل شتاء
كام موظف في الاحياء من ادارين ومهندسين بياكلوا حرام ويطنشوا في قرارات الازاله
كام معلم عنده حته ارض راح بناها هوبا هوبا وبيع واخلع
كام وكام وكام وكام
؟؟؟؟؟؟؟؟؟؟؟؟؟؟؟؟؟

الحقيقه
ان العماره انهارت
انهارت العماره وانهارت معها احلام اكتر من 15 اسره كامله تسكن بها
انهارت العماره وانهار امال سكان العمارتين المجاورين لها حيث تم اخلائهما لتصدعهما من الحادث
انهارت العماره وانهار معها الستار الذي يكشف الفاسدين في احياء الاسكندريه والادارات الهندسيه المرشيه
انهارت العماره وانهارت معها احلام الاف الشباب الراغب بالزواج حيث ارتفعت اسعار البناء 3 اضعاف
انهارت العماره انهارت اعصاب مئات الاشخاص من اقارب وجيران الضحايا
انهارت العماره وانهارت معها اعصابي وضربت كف علي كف
وقولت لا اله الا الله

هم وغم : علي ارواح الناس اللي راحت
حيرة وتعجب : من صاحب العماره والمسؤلين

نسمات

استغفر الله العظيم
ايه اللي حصل بقي
الواحد بقي مشغول حبتين .. حبتين ايه .. مشغول كتير
دراسه علي شغل علي مشاكل حياتيه
الله المستعان
ليكم مني حبه همسات

1- احنا وثقافات الشعوب
يوم الجمعه المنصرم - يعني اللي فات - كنت ماشي وراء جنازه بتاعت واحد معرفه من بحري وكان بحري يومها يعج بالسياح اللي جايين يسيحوا عندنا ايشي صينين وايشي ناس لونهم احمر المهم واحنا ماشيين كان محطه الترام قاعد علي الكرسي بتاعها ناس كتير منهم اتنين اجانب واحد وواحده شافونا وبصوا علينا قام راجل صعيدي قاعد جنبهم واقف عشان الجنازه راحوا الاجانب واقفين احتراما للجنازه قام الصعيدي رافع صباعه يتشاهد راحوا رافعين صباعهم زيه
بصراحه استغربت جدا من الموقف دا
الاجانب اللي هما علي غير ديننا احترمونا واحترموا الجنازه بينما كان هناك حبه بني ادم قاعدين جنبهم ولا هزهم منظر الجنازه ولا حتي القوا لها بالا
بصيت لهم كده وقولت فين الاحساس قام رادد عليا واحد ماشي جنبي احساس مين ياعم الحاج الناس دي ماتت من زمان يابا
ماتت واندفنت بالحيا
قالي بص كده عليهم
ادي واحد شعره ابيض بس شكله شب ايه اللي شيبه اكيد لا لاقي جوزار ولا شغل
دا ميت ولا لا
وادي واحده قاعده لابسه اسود اكيد جوزها مات وموتها معاه تلاقيها دايخه علي المعاش من يوم ما مات
دي ميته ولا لا
وادي واحد نايم علي الرصيف اكيد اكيد بيته وقع وقالوا له تعالي خدلك شقه ومن ساعتها مستني الشقه
دا ميت ولا لا
يابا احنا متونا من زمان علي الاقل اللي جوا دا مات واستريح راح للي حيرحمه اما احنا متنا وقاعدين مع اللي ما بيرحمش
ربنا يرحمنا جميعا دخلنا ميدان المساجد بابو العباس ( الفاتحه ) عشان نصلي الجنازه في العصر وكان هناك سياح كتير واكترهم لما شافوا الجنازه اخدو جنب ووقفوا بدون اي حراك لغايه لما الجنازه مشيت
شألأت المرشد السايحي بتاع الفوج قالي دول واقفين احتراما للجنازه
وتشوف الناس جنبهم المصريين ولا اكن هناك شئ يذكر
اكيد الاختلاف بين الثقافات شئ مهم في تباين الحضارات والتقدم
ليه احنا كده مافيش دم خالص انعدم ولا ايه ؟
آل مصر بتتقدم بينا آل
انا عايز اعرف مصر حتتقدم بمين بالضبط
يابلد ماتت مين يصحيكي
فين ولادك فين عيالك فين شهيد سينا الحبيب
مين يضحي بدمه عشان ماتهون عليه امه
...................................

2-انك ميت وانهم ميتون
يوم الاحد المنصرم الطبيعي بتاعي بصي الصبح بدري جدا جدا الساعه 6 يعني يضوب بنام نص ساعه بعد الفجر اقوم واخد الدش بتاعي والبس هدومي واخد اخواتي البناتيت واتكل علي الله اوديهم مدارسهم اللي في ثالثه اعدادي واللي في رابعه ابتدائي واللي رايحه شغلها مدرسه حضانه مع انها مهندسه زهور وزينه واروح انا علي مدرستي اروح علي التربيه العملي لثالث سنه ليا في نفس المدرسه نشوف الطابور العسل العيال الصغيرين شكلهم يجنن علي الصبح وبعدها نقعد انا واصحابي نناكف في الموجهه عشان طريقه التحضير والكلام دا وعلي الساعه 10 كده جالي تليفون موبايل لقيت مكتوب عبدالله عصفور قولت ياربي الواد دا مايصحاش بدري كده الا لما يكون مصيبه حصلت رديت عليه وقولت خير انشاء الله قام قالي محمد ابن عمك مات قولتله محمد مين قالي محمد اللي في ثانويه عامه ... لا حول ولا قوه الا بالله العلي العظيم .. فعلا انك ميت وانهم ميتون .... مات ازاي دا يابني بيقولي وقع من البلكونه وهوا بيعدل حاجه في الحيطه بتاعتها وانتهت المكالمه
فعلا الموت ليس له سن او جنس او لون
ولا لسه بدري و لا انت صغير ولا عيش حياتك
الموت مالوش كبير الا ربك
وبعدها بكام يوم لقيت ابويا الحاج عصفور عمال يزعق ويشتمني !!!!!!! الله ايه اللي حصل دي عمرها ما حصل قبل كده لقيت امي جايا جري عليا تقولي انزل ربنا يهديك قولت لها حاضر ونزلت ... اصلي كنت واقف علي كرسي في البلكونه بركب وصله نت لاحد الجيران في الراوتر عندي
ربنا يباركلي فيهم قولو امين
ربنا اغفر لمحمد واعفو عنه وتجاوز عن سيئاته وزد في حسناته قولوا امين
..................................
3- العالم ولاد الـ...........
اسف علي التعبير السابق بس دا اخف تعبير يمكن ان يقال علي المتخلفين عقليا اللي اسمهم حرس الجامعه بعد اللي عملوه مع الطلاب في كليتي الاداب والتربيه اليومين اللي فاتو
لما تدخل الحرم الجامعي اسمه ايه يا شباب حرم جامعي
يفتشك ويفتش اللي جايبينك ويشتمك ويلعن سلسفيل اللي جابوك
تبقي تعرف انك في احدي جامعات مصر العريقه منارات العلم والحضاره في العالم
جامعه الاسكندريه اللي هيا اقدم جامعات العالم القديم والحديث
علي باب كليات الرقي الفكري والنمو التربوي كليتي التربيه والاداب
اعرف انك
حتتفتش حتتفتش
كنت ولد او بنت او حتي مخنث
حتتفتش حتتفتش
معاك شنطه او اسكتش
حتتفتش حتتفتش
في باب كليه الاداب الضابط ابن الـ .............. عايز يفتش واحد والواحد دا رفض قام ضربه علي وشه وكسر له النظاره
في باب كليه التربيه الضابط ابن الـ................. عايز يفتش واحد والواحد دا رفض قام طرده ومنعه من دخول المحاضره
والاتنين الضباط الحلوين دول ليهم حق لان الطلاب الاتنين خطر علي الامن القومي ويحملون سلاح رهيب وفتاك
انه الاسكتش او كشكول المحاضرات
عايز يفتش الاسكتش ورقه ورقه
يبقي ايه دا
ليكم التعليق !!!!!!!!!!!!!!!!!!!!!!!!!ء
.................................
4-اجتماع مدوني الاسكندريه
مدوني الاسكندريه اللي كنت اعرفهم وحسبهم دول كل مدوني الاسكندريه لقيت ان هناك مدونين اوعي وشك ناس فكر عالي جدا وراقي جدا مهندسين واطباء واساتذه جامعه ايه الحلاوه دي دا هو الاجتماع الصح للناس الصح
يعني صح الصح
احترام ايه وتبادل افكار ايه وذوق ايه وادب ايه
حسيت وانا قاعد معاهم اني قاعد في مجلس الامه لنناقش احوال البلد وننافش احوالنا حسيت ان الخير لسه موجود والناس الطيبه موجوده
بجد سعدت بلقائهم جدا وياريت يتكرر
.................................
5- قدر الله وما شاء فعل
ههههههههههههههههههههههههههههههههههههههههه
هذا ما قلته بعدما نزلت من المشروع في ميامي وحطيت ايدي في جيبي عشان اروح اجيب كارت شحن للتليفون
مالقيت ولا مليم ولا احمر ولا حتي اخضر
فين الفلوس انا كان معايا حوالي حاجه و عشرين جني
ياربي انا ركبت المشروع من سيدي بشر ودفعت ربع جني وحطيت باقي الفوس في الجيب
طب ايه العمل ماعيش فلوس اروح ولا فلوس اتكلم في تليفون وحتي الرصيد نفد وكمان الخيبه رسايل كلمني شكرا مافيهاش غير رساله واحده واللي انا مستنيه اتأخر عليا
قولت الرب واحد والعمر واحد
وبعت الرساله الاخيره دي للي انا مستنيه وقولت امري لله
واستنيي ولاحياه لمن تنادي
اعمل ايه ياربي بيتي بعيد جدا عن ميامي ولو مشيت لغايه البيت يبقي حوصل علي بعد بكره
فجأه لقيت تليفوني يعمل فايبريشن قولت الحمد لله فرجت ومسكت التليفون بايدي ثابته ونفس واثقه مما تفعل وضغطت بقوه علي زر الرد واذا بي اقول السلام عليكم الووووووووووووووووووووووو
ولكن لاحياه لمن تنادي
الشبكه مشغوله
فقدت الامل في البشر ووشوشت نفسي اكيد الامل في ربنا
بصيت في السما وقولت يارب ونزلت راسي لقيت اللي انا كنت مستنيه قدامي بيقولي بخ
بصراحه كنت حقتله بس حمدت ربنا انه جي وخلصنا مشوارنا وروحت طبعا علي حسابه
ذلك فضل الله يؤتيه من يشاء والله ذوالفضل العظيم
.................................
6- IF
قاعده ايف بالعربي

ايف يو ونت بي هابي .... يو ماست صلي علي النبي

دعوة

(وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجاً لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآياتٍ لِقَوْمٍ يَتَفَكَّرُونَ) (الروم:21)

يدعوكم

محمد عصفور

(اللي هوا انا )

لحضور كتب كتاب

اختي المهندسه زينب علي المهندس محمدالجارم

وذلك يوم الجمعه

الموافق 7/9/2007

بمسجد اولاد الشيخ الجديد (الكبير) بمحرم بيك
بعد صلاة العشاء

وعقبالكم وعقبالي

........................................

وصفه المسجد

مسجد اولاد الشيخ

شارع محرم بيك علي الترام

عند محطة ترام بوالينو

واللي ما يعرفش الوصفه

ينزل محطه مصر ويركب الترام الصفراء

ويقول للكمسري عايز محطه بوالينو

عند الجامع

بس اوعي تدخل الكنيسه اللي جنب الجامع

.....................

مستنيكم باذن الله

واخص بالدعوه

كل زوار مدونتي

وكل المدونين اللي بزورهم

وكل اصحابي في الكليه وجامعه اونلاين

ومنتدي جامعه اون لاين

..............................

واللي مش حيقدر يجي يبارك في التعليقات

من بحري وبنحبوه

تغطيه من شاطئ الانفوشي
بحري
الاسكندرية

انا مش حتكلم
خلي الصور والفيديو تتكلم
وبعد كده اقول رايي
وبعدين قولوا رايكم في الموضوع

اولا الصور

ثانيا الفيديو








رأي احد رجال المحافظه في الموضوع


راي احد المصيفين في الموضوع


اللي حصل بالضبط
يوم 1/8/2007
ذهبت قوات محافظه الاسكندريه
لشاطئ الانفوش ببحري
لسحق وتدمير كل المقاهي والكافتيريات
من علي رمال الشاطئ الممتده حوالي 100 متر
عمقا و500 متر عرضا

حسب كلام رجال المحافظه
انهم اعطوا مهله للعاملين هناك
حتي يخلوا المكان
لان المحافظه قررت ان يكون الشاطئ مجاني للشعب الغلبان

وعدي الشهر
ولم يستجيب العاملين
فتم سحق كل الكافتيريات
لان هم كانوا يستغلون الشعب
المفروض ان الشمسيه وال3 كراسي بخمسه جنيه
هما كانوا بيعملوها بعشره او خمنتاشر جنيه

المهم كله اتشال وشركه فيولا او اونكس سابقا
بتشيل اثار الدمار من الموقع

ولما اخدنا راي الناس فرحوا اوي باللي حصل
بانهم اتخلصوا من البلطجيه والاستغلال

الموضوع لم يكمل بعد
لسه سوف يتم نشر
فيديو
باراء المصيفين
واراء اصحاب اماكن العمل
وايه اللي حصل

الموضوع دا من تصوير
عصفور
مدونه المواطن المطحون
واي نسخ اوتعدي علي الصور والفيديو
سوف اتخذ الاجراءات القانونيه تجاهه

كاس في الراس يوجع

الدربي او القمه

ماتش امبارح متميز جدا

الاهلي لعب حلو والزمالك كمان

بس اللي يستحق الكاس

الاهلي

طبعا

بس كان مفروض يكون فيه كاسين

واحد للمتميز والاخر

للفريق الاخر المتميز ايضا

وقد نقلت وكالات الانباء الخبر الاتي

:

نبأ عاجل :ما كاد مشجعي الفريق المشهور بالهزيمة يخرجون من مستشفيات الامراض العقلية الا وتولوا علي العودة الي تلك المستشفيات بعد ما حدث في لقاء الامس وقاموا باخبار المسؤلين عن مستشفيات الامراض العقلية بانهم يريدون البقاء فيها للابد

محدث النبأ العاجل: وقد شهدت تلك المستشفيات انهيار جميع من دخلوها واسفرت هذه الهستيريا بأنتحار نصف مشجعي الفريق الابيض ويذكر انهم كانوا يعالجون من اثار هزيمة ال 6/1 التاريخية

ونوعدكم بانتحار النصف الاخر بعد ماتش السوبرمراسلكم اهلاوووووووووووي جدا من امام سور القلعة البيضاء المهشم

الكريزي صعيدي مان : مراسل المدونه الرياضي

مع الاعتذار للزمالك ومشجعيه

أضحك...........بس من قلبك

بدل الغم اللي احنا فيه قولت نفرفش شويه

....................................................................................

في واحد معاه أرنب يريد يبيعه جاه واحد محشش وقال له بكم القرد ؟ رد عليه .. ياخي هذا أرنب مش قرد .. قال المحشش يابو الشباب أنا أسأل الأرنب ماسألتك.....

..................................................................................

في جماعه صعايده راحوا يلعبوا علي الطريق السريع واتفقوا ان الي تخبطه عربية مرتين يطلع بره اللعبة

....................................................................................

مره واحد ومراته قاعدين في الطياره فالراجل قال لمراته روحي هاتيلي اشرب فراحت جابتلوه ميه بعد شوية قالها روحي هاتي اشربفراحت ومجبتش قالها فين الميه قالتلوه اصل الزير الي كنت بجبلك منه لقيت واحد قاعد عليه

........................................................................................

واحد راح للدكتور قال له "يا دكتور انا عندي مشلكة فظيعة جدا، بانسى بسرعة" الدكتور قال له "المشكلة دي عندك من إمتى؟" قال له "مشكلة إيه؟"

..........................................................................................

مرة واحد بيعدي الشارع مع صحابه خبطته عربية مات. نقوا واحد منهم عشان يقول لمراته فراح لها فتحت له الباب قال له: "جوزك ضيع كل فلوسه ع القمار" قالت له: "إلهي ينشل البعيييد!" قال لها: "و باع البيت" قالت له: "إلهي يبيعوا عنيه!" قال لها: "و اتجوز عليكي على فكرة" قال له: "إلهي يدخلوا عليا شايلينه" الراجل قال: "بس..خشوا يا شباب..."

................................................................................................

واحد و مراته متخانقين فبطلوا يكلموا بعض، الزوج كتب ورقة "صحيني الساعة 6:30 عشان عندي شغل" و حط الورقة على السرير و نام صحي الساعة 10:00 فلقى ورقة مكتوب عليها "الساعة 6:30 يلا اصحى"

.............................................................................................

في واحد مفلس ومنحوس ماشي في الطريق فلقى عربية عاملة حادثة، ولما شاف الضحايا، ففكر انه يقطع ودنه ويحطهاقدامه عشان ياخذ التعويض، وبعد ما عمل كده اكتشف انهم بيصوروا فيلم سينمائي.

.............................................................................................

واحد فات على مطعم يريد ان ياكل وليس معه نقود. فرفضوا اطعامه فقال : اذا لم تطعموني اعمل مثل ما عمل اخي فخافوا منه واطعموه وبعد ان انهى طعامه سألوه : ماذا فعل اخوك؟ فقال: نام بدون عشاء .

......................................................................................

واحد مسطول بيقول لصاحبه مش عارف يا أخي عود الكبريت ده ما بيولعش ليه مع إنه لسه مولع من شوية!

.......................................................................................

زرافة و فيل وأسد وفأر وثعلب وارنب ماشيين في الغابة, وقعوا كلهم في حفرة، إلا الزرافة، فقالولها: جيبي لنا حبل قالتلهم: ما فيش، قالولها: إحنا جعانين عايزين ناكل قالتلهم: ماعرفش أجيب لكم أكل، قالولها: والعمل؟ قالت لهم كلوا أضعفكم ..... قام الفأر نط مفزوع وقال لهم: اللي حيقرب من الأسد حيعرف شغله.

..........................................................................................

بيقولوا للريس قبل الانتخابات "انت مش هاتودع الشعب وللا ايه؟" قاللهم "ليه هو الشعب رايح فين؟

...........................................................................................

مرة الريس حب يعرف الشعب بيحبه ولا لأ فإتنكر ونزل الشارع ودخل على قهوة بلدى فلقى القهوجى معلق صورة صغيرة لعبد الناصر وصورة صغيرة للسادات وصورة كبيرة للريس فسأله : انت معلق صورة عبد الناصر ليه؟؟؟؟؟قال له : لأنه هو اللى قام بالثورةفقال له : طيب ومعلق صورة السادات ليه؟؟؟؟؟قال له : لأنه هو اللى انتصر فى اكتوبرفقال له : طيب ومعلق صورة اخينا ليه؟؟؟؟؟قال له : لأنه ابو شريكى فى القهوة

.....................................................................................................

التلميذ : بحبك يا أبله و عاوز أجوزك... المدرسه: بس أنا مبحبش الأولاد الصغيرين... التلميذ: وأنا مش مستعجل على الأولاد

.................................................................................................

واحد من الجماعة المهمين سأل الاخ بوش في الخباثه : إنت ليه متأكد إن في نووي;في العراق!!! بوش : لأن معايا الوصل اللي أبويا باعهلهم بيه

..........................................................................................

بلدياتنا نجح في انتخابات مجلس الشعب, ففي اول جلسة قاعد جنب واحد افندى فالأفندى عزم عليه بسيجارة مارلبورو, وبعد شويه بيسالوا إيه رأيك في الديمقراطية ياحاج؟؟.. فرد الحاج : والله أحسن من الكيلوبترا

...............................................................................

لا تنسوا التعليقات

..........شوارع وبيوت ...........

علي رأي عبد الحليم حافظ
من حاول فك ضفائرها
مفقود مفقود ياولدي
وانا اقول
مطحون مطحون يا ولدي

واخيراً عرفت الفرق بين اطفال البيوت واطفال الشوارع

شوارع و بيوت

بداية ونهاية

بجد بدايه ونهاية
اليوم الاول
الواحد بعد ماطلع عينه وعين اللي خلفوه في المذاكره والامتحانات وتصوير الورق اللي في الاخر بنقلي عليه سمك اخيرا ً الواحد ارتاح واخد نفسه

الحمد لله ان الواحد لسه بعقله

وانا قاعد بعد العصريه ومعايا كوب من الشاي المغشوش وقاعد ادام الزفت الكومبيوتر مش لاقي جديد فيه جالي تليفون علي المحمول واحد صحبي في الكليه رديت عليه
....: الو
....: الو السلام عليكم
....: عصفور باشا هاو ار يو كيفك
....: الحمد لله كيفك انت
....: ايه ياعم انت مش نازل شغل الصيف دا ولا ايه
....: والله انا بدور علي شغل بس يكون مرتب اشطه عشان الواحد عايز يجيب عده تمام
....:حتجيب ايه
....:نوكيا E61 i
....:ايوه ياعم يا بختك علي العموم انا عندي شغلانه عنب
....: قول يا عم انا في ارتفاعك
....:شغل في سان استفانو في الفندق علي 1000 جنيه
....: لايمني عليه كده الواحد يشتغله شهرين ويروح يتجوز
....: هااهاهاهاهاها
....:اوك يامان نروح امتي
....: كل يوم في الاداره في الفود كورت من8 : 4 ماعدا الجمعه
....:باذن الله حكون هناك انا والشله
....: باي
....: باي سلام
تيت تيت تيت تيت تيت

والمكالمه انتهت واخذت تنهيده عميقه من الفرح بالمرتب اللي مايحلمش بيه شاب لسه بيدرس في الكليه وروحت قولت لابويا علي الموضوع
راح قالي يابني بس اتكل علي الله وشوف مصلحتك بس ابعد عن الحرام الحرام مابيدومش
قلتله اشطه عليك ياعم الحاج

وبعد اجراء بعض الاتصلات بالشله المصونه والاتفاق علي المعاد والمكان وان كل واحد يروح يصور بطاقته الشخصيه ويجي وانتهي اليوم علي كده

اليوم الثاني

في تمام الساعه 12 ظهرا بتوقيت الاسكندريه تقابلت مع 2 من الد اصدقائي في ميدان العصافيري الدولي بمحطه مصر واتجهنا الي ساحه المشاريع المتجه الي اي حاجه بحر
المهم ركبنا اتوبيس من الجديد الازرق ابو جنيه وحلفنا علي بعض مين فينا اللي يدفع لي عشان انا جبت لهم الشغل ابو 1000 في الشهر اللي عمر واحد من ابوهم قبض المبلغ ده ولا حتي ابويا اللي بقاله 30 سنه في التربيه والتعليم

وطول السكه انا واصحابي حيكي وميكي والفيل صديقي يعني نحكي ونتكلم ونضحك وعند القرب من شاطئ جليم رحت قلت بصوت جهوري استفانو ياريس عند الفندق راح رد السواق ربنا يسهلكم
ودخلنا الفندق عند الفود كورت وكتبنا اسامينا وارقام موبايلتنا وقالوا حنتصل بيكم ان شاء الله اول ما نعوزكم
ومشينا روحنا المول ايه دا ياخونا ايه المباني دي احنا مش عايشين في البلد ولا ايه ايه ده محلات ايه مزز رايحه ومزز جايه ايه ده استغفر الله العظيم
وبعدين روحنا لحال سبيلنا

اليوم الثالث
انتظر الاتصال وحاطط الموبايل في البلكونه عشان الشبكه ومافيش فايده

اليوم الرابع
نفس النظام

اليوم الخامس
اتصل المدعو..... من الفورسيزونس سان استفانو جراند بلازا
وقال بكره الساع 2.5 الظهر في الفندق
قلتله ماشي حكون هناك في تمام الساعه 2.5

اليوم السادس

في ميدان العصافيري الدولي اتجمعت انا والاصحاب واتجهنا الي الطائره المتجه اي حاجه بحر ومفيش غيره الاتوبيس ابو جنيه المهم وصلنا ورحنا هناك
قال حتستلمو الشغل من الان لمده 12 ساعه او ولا نجيب غيركم
قولناله اوك في صوت واحد وراح اخد ا سامينا تاني وعطي كل واحد منا مينتاج شبه اي دي الشركات ورحنا الموقع بتاع الشغل
وبدأ بتعريفنا طبيعه الشغل وهو تأمين اماكن معينه في الفندق لحين ان تسلم شركه التشطيبات كل اعمالها وتعرفنا علي كل منافذ الموقع والمداخل والمخارج
والموقع كان الريسبشن الرئيسي للفندق واول ما دخلنا حسبت نفسي في الجنه مالا عين رات ولا اذن سمعت ولاكنها خطرت علي قلب مؤمن وكافر
ايه ده ياخونا ايه المكان ده الواحد شغال ريس وقاعد في التكيف ومظبط وكله في الكلتش كولكشن كان
وبعين اخذنا ساعه راحه في البريك رووم وهناك مطبخ امريكاني عشان يظبطوا العاملين ويعرفوا ينتجوا
اخذت السرفيس بتاعي وحطيت عليه طبق ومعلقه وشوكه وسكينه وحطيط السلطات ما لذ وطاب من السلطات وكذلك ما لذ وطاب من الطعام الفاخر
وساعتها بس عرفت الناس هناك بتشتغل من غير ما تمل ليه عشان كله تظبيط
وخلصت اكل وخلصت الشيفت بتاعي واتكلت علي الله انا واصحابي
ولكن كنت بدردش مع بعض العمال القدامي ومع تفقدي للمكان اكتشفت اشياء خطيرة
1- المكان به بارات وخمور وويسكي وكل حاجه تسطل
2- يوجد حمام سباحه للعرايا تحت الانشاء
3- الفندق 7 نجوم يعني هناك غرف ( استغفر الله العظيم ) مرخصه
4- يوجد مارينا في البحر المقابل للفندق وسيكون بها كل شئ محظور
5- ان سان استفانو حقق المعادله الصعبه جمع بين شرم ومارينا في مكان واحد في قلب اسكندريه

قلت انا واصحابي احنا لوكمانا في الشغلانه دي يبقي لازم نروح لجزار نركب قرون ونعمل نفسنا عبط واكننا مش حنشوف اللي بيحصل

واصدران القرار الملكي الاتي
ترك العمل في هذا المكان الملعون وننسي ان لينا مرتب يوم ونحاول نصرف الاكل اللي احنا اكلنا هناك باي شكل من الاشكال
لان كل ده مال حرام لانه يدخل فيه خمور ونسوان وغيره وغيره ولو الواحد اشتري بالمرتب هدوم ممكن تولع فيه

وانتهي اليوم واحنا حاسيين اننا عملنا شئ ايجابي ويغور المال الحرام وتغور سيرته

وفعلا كانت

بدايه ونهايه

الرسول الكريم قال ((( إن الحلال بيّن والحرام بيّن ، وبينهما أمور مشتبهات لا يعلمهن كثير من الناس ، فمن اتقى الشبهات فقد استبرأ لدينه وعرضه ، ومن وقع في الشبهات فقد وقع في الحرام ، كالراعي يرعى حول الحمى يوشك أن يرتع فيه ، ألا وأن لكل ملك حمى ، ألا وإن حمى الله محارمه ، إلا وإن في الجسد مضغة إذا صلحت صلح الجسد كله ، وإذا فسدت فسد الجسد كله ، ألا وهي القلب ) رواه البخاري و مسلم
وقال ايضا (( من ترك شيئا لله عوضه خير منه ))

المهم اني اكتشفت الفرق بين معامله العمال في شركه مصريه وشركه اجنبيه


وانا اهو قاعد ادام الزقت الكومبيوتر ادور علي شغل او اعمل اي حاجه مفيده

استقرار حالة محمد صديق

صرح الأطباء القائمون على إسعاف لاعب الأهلي محمد صديق أن اللاعب قد أفاق من إغماء مؤقت لم يكن بسبب بلع لسانه وإنما بسبب اصطدامه بوائل خليفة حارس مرمى طلائع الجيش في المباراة التي جمعت بين الفريقين. ولقد تم عمل أشعة مقطعية للاعب للتأكد من خلو أي مضاعفات للإصابة وتأكد الأطباء من سلامة صديق الذي كان قد سقط على أرض الملعب وسط خوف شديد على اللاعب من قبل لاعبي الفريقين خاصة وائل خليفة حارس مرمى طلائع الجيش.استقرار حالة محمد صديق