بحث مخصص

بسم الله الرحمن الرحيم

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاءَ عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا
الاقصى

Wednesday, July 25, 2007

رسالة إلي فرعون مصر


قصيده
لــ
عم
أحمد فؤاد نجم

نظرا لأن النعمة فاقت حدها

ولأننا مش قدها

ولأن فعلا انجازاتك

فوق طاقتنا نعدها

ولأننا غرقنا في جمايل

مستحيل حنردها

نستحلفك ....... نسترحمك

نستعطفك .......نستكرمك

ترحمنا من طلعة جنابك حبتين

عايزين نجرب خلقة تانية

ولو يومين

اسمع بقى

إحنا زهقنا من النعيم

ونفسنا في يومين شقا

عايزين نجرب الاضطهاد

ونعوم ونغرق في الفساد

بيني وبينك حضرتك

دا شعب فقرى مايستحقش جنتك

أنا عارفه شعب ماينفعوش

إلا شارون وبلير وبوش

عايز يجرب الامتهان

ويعيش عميل للأمريكان

بيمد "غازه" لإسرائيل

ويومين كمان ويمد نيل

أهو يعنى نشرب ميه واحدة

ندوب في بعض

ماء وماء وماء

ونفض سيرة الانتماء

وبلاها نعرة وطنطنة

تبقى البلاد "مستوطنة "

(متسلطنة بالسرطنة)

إيه اللي خدناه م الكرامة والإباء

حبة خطب وكلام...كلام

إحنا راهننا على النظام

ورضينا بخيار السلام

بخيار حنسد عين الشمس بيه

علشان مايطلعش النهار

ويطلع لمين؟

حبة معارضة مغرضين؟

وحسب بيان السلطة

شلة مأجورين؟

ياعم فضك سيرة

وارضى بقسمتك

دا شعب مش فاهم أكيد

يالا اطرده من رحمتك

وإن كنت غاوي الحكم

خليك مطرحك

حاغطس واقب وأعود

بشعب يريحك

راضى وعمره مايجرحك

أخرس ومايسمعش

وأعميلك عينيه

مش كل قرش يبص فيه

مايقولش لأه، وفين، وليه

يضرب ينفض في السليم

وعلى الصراط المستقيم

كل اللي يعرف ينطقه

عاش الزعيم

يحيا الزعيم

.......................

أحمد فؤاد نجم

6 comments:

Anonymous said...

يا ريت يقراءها ويعرف احنا قد ايه بنحبه

Anonymous said...

الله ياست

صانعة الحرية said...

السلام عليكم
اولا ابيات رائعه وربنا يخليك يا عم نجم
ثانيا عندى استفسار ولكم جزيل الشكر ازاى ارتب الموضوعات فى المدونه؟ يعنى عايزه الترتيب الموضوعات القديم وبعدين الجديد يبقى ازاى؟

miro said...

رساله حلوه اوى وهل فعلا ده هيكون شكل........؟

عصفور اسكندرية said...

ايه يابو صلاح

دا فرعون مات من زمان
انت لسه فاكر

ايه يامنحرف

شايفني ام كلثوم

صانعه الحريه

حرد في المنتدي باذن الله

اميره

الله يكرمك بس دا شكله اصلا

مشروع انسان said...

اخيراااااااااا
كنت بدور على مدونتك
طب خير انى وصلتلك ربنا يكرمك
خدت نمرة تليفونى من عمرو ولا ايه
طيب خلاص هاعديها المرة دى
السلام عليكم