بحث مخصص

بسم الله الرحمن الرحيم

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاءَ عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا
الاقصى

Friday, November 09, 2007

نسمات


استغفر الله العظيم
ايه اللي حصل بقي
الواحد بقي مشغول حبتين .. حبتين ايه .. مشغول كتير
دراسه علي شغل علي مشاكل حياتيه
الله المستعان
ليكم مني حبه همسات

1- احنا وثقافات الشعوب
يوم الجمعه المنصرم - يعني اللي فات - كنت ماشي وراء جنازه بتاعت واحد معرفه من بحري وكان بحري يومها يعج بالسياح اللي جايين يسيحوا عندنا ايشي صينين وايشي ناس لونهم احمر المهم واحنا ماشيين كان محطه الترام قاعد علي الكرسي بتاعها ناس كتير منهم اتنين اجانب واحد وواحده شافونا وبصوا علينا قام راجل صعيدي قاعد جنبهم واقف عشان الجنازه راحوا الاجانب واقفين احتراما للجنازه قام الصعيدي رافع صباعه يتشاهد راحوا رافعين صباعهم زيه
بصراحه استغربت جدا من الموقف دا
الاجانب اللي هما علي غير ديننا احترمونا واحترموا الجنازه بينما كان هناك حبه بني ادم قاعدين جنبهم ولا هزهم منظر الجنازه ولا حتي القوا لها بالا
بصيت لهم كده وقولت فين الاحساس قام رادد عليا واحد ماشي جنبي احساس مين ياعم الحاج الناس دي ماتت من زمان يابا
ماتت واندفنت بالحيا
قالي بص كده عليهم
ادي واحد شعره ابيض بس شكله شب ايه اللي شيبه اكيد لا لاقي جوزار ولا شغل
دا ميت ولا لا
وادي واحده قاعده لابسه اسود اكيد جوزها مات وموتها معاه تلاقيها دايخه علي المعاش من يوم ما مات
دي ميته ولا لا
وادي واحد نايم علي الرصيف اكيد اكيد بيته وقع وقالوا له تعالي خدلك شقه ومن ساعتها مستني الشقه
دا ميت ولا لا
يابا احنا متونا من زمان علي الاقل اللي جوا دا مات واستريح راح للي حيرحمه اما احنا متنا وقاعدين مع اللي ما بيرحمش
ربنا يرحمنا جميعا دخلنا ميدان المساجد بابو العباس ( الفاتحه ) عشان نصلي الجنازه في العصر وكان هناك سياح كتير واكترهم لما شافوا الجنازه اخدو جنب ووقفوا بدون اي حراك لغايه لما الجنازه مشيت
شألأت المرشد السايحي بتاع الفوج قالي دول واقفين احتراما للجنازه
وتشوف الناس جنبهم المصريين ولا اكن هناك شئ يذكر
اكيد الاختلاف بين الثقافات شئ مهم في تباين الحضارات والتقدم
ليه احنا كده مافيش دم خالص انعدم ولا ايه ؟
آل مصر بتتقدم بينا آل
انا عايز اعرف مصر حتتقدم بمين بالضبط
يابلد ماتت مين يصحيكي
فين ولادك فين عيالك فين شهيد سينا الحبيب
مين يضحي بدمه عشان ماتهون عليه امه
...................................

2-انك ميت وانهم ميتون
يوم الاحد المنصرم الطبيعي بتاعي بصي الصبح بدري جدا جدا الساعه 6 يعني يضوب بنام نص ساعه بعد الفجر اقوم واخد الدش بتاعي والبس هدومي واخد اخواتي البناتيت واتكل علي الله اوديهم مدارسهم اللي في ثالثه اعدادي واللي في رابعه ابتدائي واللي رايحه شغلها مدرسه حضانه مع انها مهندسه زهور وزينه واروح انا علي مدرستي اروح علي التربيه العملي لثالث سنه ليا في نفس المدرسه نشوف الطابور العسل العيال الصغيرين شكلهم يجنن علي الصبح وبعدها نقعد انا واصحابي نناكف في الموجهه عشان طريقه التحضير والكلام دا وعلي الساعه 10 كده جالي تليفون موبايل لقيت مكتوب عبدالله عصفور قولت ياربي الواد دا مايصحاش بدري كده الا لما يكون مصيبه حصلت رديت عليه وقولت خير انشاء الله قام قالي محمد ابن عمك مات قولتله محمد مين قالي محمد اللي في ثانويه عامه ... لا حول ولا قوه الا بالله العلي العظيم .. فعلا انك ميت وانهم ميتون .... مات ازاي دا يابني بيقولي وقع من البلكونه وهوا بيعدل حاجه في الحيطه بتاعتها وانتهت المكالمه
فعلا الموت ليس له سن او جنس او لون
ولا لسه بدري و لا انت صغير ولا عيش حياتك
الموت مالوش كبير الا ربك
وبعدها بكام يوم لقيت ابويا الحاج عصفور عمال يزعق ويشتمني !!!!!!! الله ايه اللي حصل دي عمرها ما حصل قبل كده لقيت امي جايا جري عليا تقولي انزل ربنا يهديك قولت لها حاضر ونزلت ... اصلي كنت واقف علي كرسي في البلكونه بركب وصله نت لاحد الجيران في الراوتر عندي
ربنا يباركلي فيهم قولو امين
ربنا اغفر لمحمد واعفو عنه وتجاوز عن سيئاته وزد في حسناته قولوا امين
..................................
3- العالم ولاد الـ...........
اسف علي التعبير السابق بس دا اخف تعبير يمكن ان يقال علي المتخلفين عقليا اللي اسمهم حرس الجامعه بعد اللي عملوه مع الطلاب في كليتي الاداب والتربيه اليومين اللي فاتو
لما تدخل الحرم الجامعي اسمه ايه يا شباب حرم جامعي
يفتشك ويفتش اللي جايبينك ويشتمك ويلعن سلسفيل اللي جابوك
تبقي تعرف انك في احدي جامعات مصر العريقه منارات العلم والحضاره في العالم
جامعه الاسكندريه اللي هيا اقدم جامعات العالم القديم والحديث
علي باب كليات الرقي الفكري والنمو التربوي كليتي التربيه والاداب
اعرف انك
حتتفتش حتتفتش
كنت ولد او بنت او حتي مخنث
حتتفتش حتتفتش
معاك شنطه او اسكتش
حتتفتش حتتفتش
في باب كليه الاداب الضابط ابن الـ .............. عايز يفتش واحد والواحد دا رفض قام ضربه علي وشه وكسر له النظاره
في باب كليه التربيه الضابط ابن الـ................. عايز يفتش واحد والواحد دا رفض قام طرده ومنعه من دخول المحاضره
والاتنين الضباط الحلوين دول ليهم حق لان الطلاب الاتنين خطر علي الامن القومي ويحملون سلاح رهيب وفتاك
انه الاسكتش او كشكول المحاضرات
عايز يفتش الاسكتش ورقه ورقه
يبقي ايه دا
ليكم التعليق !!!!!!!!!!!!!!!!!!!!!!!!!ء
.................................
4-اجتماع مدوني الاسكندريه
مدوني الاسكندريه اللي كنت اعرفهم وحسبهم دول كل مدوني الاسكندريه لقيت ان هناك مدونين اوعي وشك ناس فكر عالي جدا وراقي جدا مهندسين واطباء واساتذه جامعه ايه الحلاوه دي دا هو الاجتماع الصح للناس الصح
يعني صح الصح
احترام ايه وتبادل افكار ايه وذوق ايه وادب ايه
حسيت وانا قاعد معاهم اني قاعد في مجلس الامه لنناقش احوال البلد وننافش احوالنا حسيت ان الخير لسه موجود والناس الطيبه موجوده
بجد سعدت بلقائهم جدا وياريت يتكرر
.................................
5- قدر الله وما شاء فعل
ههههههههههههههههههههههههههههههههههههههههه
هذا ما قلته بعدما نزلت من المشروع في ميامي وحطيت ايدي في جيبي عشان اروح اجيب كارت شحن للتليفون
مالقيت ولا مليم ولا احمر ولا حتي اخضر
فين الفلوس انا كان معايا حوالي حاجه و عشرين جني
ياربي انا ركبت المشروع من سيدي بشر ودفعت ربع جني وحطيت باقي الفوس في الجيب
طب ايه العمل ماعيش فلوس اروح ولا فلوس اتكلم في تليفون وحتي الرصيد نفد وكمان الخيبه رسايل كلمني شكرا مافيهاش غير رساله واحده واللي انا مستنيه اتأخر عليا
قولت الرب واحد والعمر واحد
وبعت الرساله الاخيره دي للي انا مستنيه وقولت امري لله
واستنيي ولاحياه لمن تنادي
اعمل ايه ياربي بيتي بعيد جدا عن ميامي ولو مشيت لغايه البيت يبقي حوصل علي بعد بكره
فجأه لقيت تليفوني يعمل فايبريشن قولت الحمد لله فرجت ومسكت التليفون بايدي ثابته ونفس واثقه مما تفعل وضغطت بقوه علي زر الرد واذا بي اقول السلام عليكم الووووووووووووووووووووووو
ولكن لاحياه لمن تنادي
الشبكه مشغوله
فقدت الامل في البشر ووشوشت نفسي اكيد الامل في ربنا
بصيت في السما وقولت يارب ونزلت راسي لقيت اللي انا كنت مستنيه قدامي بيقولي بخ
بصراحه كنت حقتله بس حمدت ربنا انه جي وخلصنا مشوارنا وروحت طبعا علي حسابه

ذلك فضل الله يؤتيه من يشاء والله ذوالفضل العظيم
.................................
6- IF
قاعده ايف بالعربي

ايف يو ونت بي هابي .... يو ماست صلي علي النبي

45 comments:

عصفور المدينة said...

اللهم صل على محمد النبي وأزواجه أمهات المؤمنين وذريته وأهل بيته وبارك على محمد وعلى آل محمد
كان من هدي النبي صلى الله عليه وسلم إذا مرت به جنازة أن يقوم واقفا لها فمرت جنازة يهودي فقام فقيل له إنه يهودي
قال أليست نفسا
صلى الله عليه وسلم

رحم الله موتاناووسع قبورهم ونور لهم فيها وأحياءنا يرحمهم الله


شعارنا الجديد
بلدي بتتقدم بي

Anonymous said...

اللهم ما اغفر للمسلمين والمسلمات المؤمنين والمؤمنات الاحياء منهم والاموات
الناس فعلا بئه فى كتير منهم عندهم لا مبالاه لابيفرق معاهم موت ولا حياه بس برضه والله لسه فى ناس عنهم احساس يعنى انا برضه كنت رايحه الكليه من يومين وناحيه سيدى بشر على البحر كان فى جنازه وكل اللى فى المشروع بلا استثناء كانوا بيبصوا على الجنازه وبيرددوا كلام بلسنهم يعنى اللى قال الشهادتيت واللى قال انا لله وانا اليه راجعون واللى دعى للميت وكده لسه فى خير
بالنسبه للبلكونه ربنا يخليك عم الحج عصفور وطنط هما خايفين عليك
بالنسبه لحرس الجامعه انا مش فاهمه كل ده ليه بجد معرفش ايه اللى حصل اصلا
بالنسبه لجيبك بئه فالحمدلله على كل شىء ولاد الحلال بئوا كتييييييييييير اوى بس يعنى كنت قريب مننا كنت انت قول ساسو بس وتلقى كل اللى انت عايزه يعنى كنت هديك الموصلات وبريزه هديه بئششه يعنى اه علشان تعرف يعنى ان لك ضهر جامد من جامعه اون لين

محمد عبد الرحمن said...

رحم الله أموات المسلمين

أخى الكريم بس ملحوظة الجامعة والتفتيش أنا شايف إن السبب فيها هم المسئولين من هيئة التدريس

موضوع الأجانب طبعا العالم دى مش كلهم وحشين طبعا عندهم تقدير للمشاعر ووهم قلدوا بلدينا لما لاقوه عمل كده من باب الرقى والمجاملة
بس الإشارة بالإصبع دى معرفش هى من السنة ولا لأ

عصفور اسكندرية said...

شيخنا وشيخ كل العصافير
عصفور المدينه
جزاك الله خيرا
بلدي بتتقدم بي شعار حلو لان التغيير بيدأ من الداخل
ولا يغير الله ما بقوم حتي يغيروا ما بأنفسهم

عصفور اسكندرية said...

ساسوو
ربنا يكرمك ويخليلك الاج ابو ساسوو والحاجه ام ساسوو
عايزه تعرفي اللي حصل بالضبط علي موقع جامعه اون لاين بالتفصيل في نبض الجامعه
كنتي قولي من الصبح انك ساكنه هناك بجد لو كان صاحبي مجاش كنت زماني لسه ماشي راجع بيتي
ربنا يكرمك دا طبعا من حسن اصلك واكيد جامعه اون لاين اصيل وناسه كلهم عندهم اصل
بس البريزه البأشيش خلتنش اشك في فلوس المواصلات وعلي العموم ربنا ركم وجالي شغالنه علي الطاير عوضت منها اللي راح

عصفور اسكندرية said...

طال الليل
رحمنا الله جميعا
بس ياريت توضح وجهه نظرك في مسؤليه هيئه التدريس في اللي حصل

اما موضوع الاجانب طبعا ظهر الفرق بين الرقي الحضاري بيننا وبينهم مع اننا مفروض ان نكون ارقي باسلامنا الكريم بس حكايه الاصبح دي ماعرفش اصلها بس هيا تعني نطق الشهاده كما في التشهد في الصلاه وهما قلدوها لاحترام الموقف دون فهم
جزاك الله خيرا

جهاد خالد said...

اللهم صلي على الحبيب المصطفى محمد

...

ثقافات الشعوب
؟؟؟
وماهي ثقافات الشعوب إلا إحساس بإنسانيتها وآدميتها كل بطريقه
فإن انتفى هذا الاحساس انتفى ما يميز الادميين وهو العقل
فأين تكون الثقافة؟؟؟

...

الحرم الجامعي
اقترح أن يصبح
(الحراااام الجامعي)
فكل شيء في الداخل
حرام
ماعدا طبعا وقفة الشباب مع البنات
والقاعدة عالكافيتريات

...

الموت
كفى به واعظ

فلنتدبر

...

معية الله
تأتينا في مواقف لا تبلغ في صغرها مقدار نملة
لكن لها في القلب المؤمن أثر لا يزال إلا بزوال الروح من الجسد

...

تدوينة خفيفة
القت الضوء على كثير

جزيت خيرا

Anonymous said...

باشا والله باشا
اول مرة احس ان انتا بدات تكتب حاجة بطعمممممم مختلف حاجة كدة تشدك ان انتا متسبش الموضوع من غير ماتكملة التدرج والنقاط صغيرة الشيقة الجميلة وليست بالمملة وهذا اتمنى لك دوام التوفيق وربنا يبعد عنا حكومةال................
سلام ياباشا وابقى اسئل

عصفور اسكندرية said...

النجمه الصامده
جازكم الله خيرا
عندك حق بالنسبه للحرام الجامعي
مااحلي الكفتريات دي هيصه مش كليات

جازكم الله خيرا وصمد معكم الصامدون

عصفور اسكندرية said...

علي باشا المنحرف
انت اللي باشا يا باشا
ربنا يكرمك كرم الناس الطيبين
ايه تحب احكي علي العجمي وايام العجمي واللي حصل في العجمي بالتفصيل
انتا عارفني مجنون واعملها
ههههههههههههههههه
عايز اشوفك في الكليه

احمد الجيزاوى said...

اللهم ما اغفر للمسلمين والمسلمات المؤمنين والمؤمنات الاحياء منهم والاموات

مشروع انسان said...

عصفور كيفك
ربنا يعينك يا فندم
نسمات من طيبة جميلة
وطبعا تقدم الغرب فعلا مش جاى من شوية ودى حاجة منهم اتعلموها كويس
حتى لو مجاملة بس
بس للاسف ناقصة فى كتير منا
واما حرس الجامعة فده موضوع مهزلة واللى حصل فى الكليات مؤخرا
اما بقى صاحبك اللى كنت هتقتله ففعلا موقف صعب جدا الحمد لله انه خلص هو ممكن يخلص بطرق بس بتبقى محرجة جدا انا كان عندى اهون انى اخدها مشى من انى اخد فلوس من حد يلا ربك فرجها

صانعة الحرية said...

السلام عليكم
مواضيع جميله
ولكن احززنى جدا وفاته ابن عمك
اسال الله العظيم ان يغفر له ويرحمه
ومش عارفه
سبحان الله اغلب اللى بيموتوا بقوا شباب واطفال
اسال الله العظيم ان يرزقنا جميعا حسن الخاتمه
ومتاسفه على التاخير
كل مره اجى ارد يطلعلى مشكله
يلا خير
جزاك الله خيرا

Anonymous said...

نسمات رائعه

من اول موضوع الاجانب

لحد لما فلوسك ضاعت

النقطه هنا انى حسيت انك بتحلل المواقف فى حياتك و مش بتاخدها حاجات بتحصل و حاجات

و دى حاجه كويسه جدا

وفقك الله

و مستنين منك الاحسن دائما

جهاد خالد said...

السلام عليكم

لكم عندنا تاج نرجو استلامه

عصفور اسكندرية said...

ابن الجيزه يا حلو
احمد الجيزاوي باشا
اكرمكم الله وشكر الله تعليقكم

عصفور اسكندرية said...

امامنا وامام الجيل
الحمد لل يافندم كيف حالك انت ؟
ربنا يكرمك بس النسمات جات معايا كده والله يلا حصل خير
بالنسبه لصاحبي انا لو هوا ماجاش كنت مشيتها هيا اه بالمواصلات ساعه وربع بس كان رربنا حيسهل

عصفور اسكندرية said...

اختنا صانعه الحريه
شكر الله تعليقكم
اللهم ارزقنا حسن الخاتمه
الدنيا مبقاش فيها بركه
حصل خير علي العطل الفني

عصفور اسكندرية said...

مريم الغنيمي
دي بعض من افكساتكم الحياتيه منكم نتعلم

ما الحياه الا مسرح كبير وكلها مواقف حياتيه
جزاكم الله خيرا

عصفور اسكندرية said...

نجمتنا الصامده
جزاكم الله خيرا علي التاج
انا عندي تاجين من مده مارديتش عليهم حبقي اجاوب كله علي بعضه ويبقي تاج ثلاثي الابعاد

صمد معكم الصامدون

Anonymous said...

أخي الحبيب / محمد...بصراحه يوميات جميله ومعبره ..... بس بلاش كان معايا فلوس ولم أجدها .... في الميكروباص ... الحركات دي إحنا فاهمنها ومع إسم المدونه يبقي إنت عايز تطلع بحسنه .... بس ده بعدك نحن معشر المدونين معانا الكلمه بس فلوس بح ....!!!

عصفور اسكندرية said...

هيثم ابو خليل
ربنا يكرمك
ايوووووووه عليك
ربنا يسامحك

المدون مش بس بكلمته المدون برعايت لبيته واسرته

Anonymous said...

انتا بتغني وترد على نفسك ياعصفور ال..........................

عصفور اسكندرية said...

hhhhahaaaaaaaaaaa
شكرا علي ادبك وذوقك

وايه يعني لما اغني وارد علي نفسي مش دي مدونتي اعمل فيها اللي انا عايزه ورينا مدونتك حتعمل ايه فيها يا خفيف ولو انت اد كده كنت كتبت اسمك

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته
ازيك ياعفور وحشني جداً
ايه النسمات الجامده دي دي عاملة زي نسمات البحر في يوم شديد الحر
جامده
ولو انت عاوز تعرف انجازات السيد نظيف
تعالى مدونتي وشوفها
سلام

محمد السيد..مش حاسكت said...

....................................................................

نو كومينت ....

بعدما قريت معرفتش أرد علي ايه ولا ايه ...
بس أحلي حاجة .. لقطة السياح دي ..بقت بتتكر كتير اوي .. مش من السياح .. إنما مننا إحنا .. ياتري بنفقد جلال المشهد؟؟؟

===================
اما العالم ولاد الـ............. فمعنديش ليهم اي كلمه ..غير .. تفووووووووووووووووووووووووووووو

بس خلاص ....
يلا سلام ....

شكلك حتجيب لنا الأذية ع المسا كده

ابن رشد said...

رحم الله اموات المسلمين جميعا
ثقافات الشعوب يا سيدي هي نتاج دينها و اخلاقها و حضارتها و مفيش حد وحش اول و لا حلو اوي

فرنسا هانم said...

الموت له رهبه
والسياح دول
وقفوا لرهبه الموت نفسه بالطبع
اما الطالب الارهابى بتاع الاسكتش
احب اقولك
دى اسكتش فكاهى جامعى
ويا قلبى لا تحزن

شقاوة شعب said...

يارب يرحم قريبك ويغفر له ويجعل مثواه الفردوس الاعلى


موقف الفلوس اللى اختفت مرة واحدة ده بصراحة صعب قوى قوى
وبيتهيألى لو مكانك(وربنا مايكتبها عليا) هاخدها مشى حتى لو بيتى يبعد عن مكانى 100 كيلو

عصفور اسكندرية said...

ميخا باشا
شكرا علي المرور
مين دا اللي جامد انت اللي جامد

عصفور اسكندرية said...

محمد السيد اللي مش حيسكت
معلش ياسيدي هو البوست كبير شويه بس نعمل ايه انت عارف
بعد كده حعمل لك بوست مخصوص لك لواحدك

اذبه علي المسا
ههههههههههههههه

عصفور اسكندرية said...

سمش الزناتي
اكرمكم الله علي المرور
بس هيا الدنيا كده

عصفور اسكندرية said...

فرنسا هانم
شكرا علي زيارتك
منروه يا فندم

ربنا يرحمنا برحمته

اسكتش فكاهي
فعلا فكاهي جدا جدا

عصفور اسكندرية said...

شقاوه شعب
امين مين يارب العالمين

ههههههههههههههه
انا كنت ناوي اخدها ماشي لولا محمد عبد الجليل اتي وجاء والحمد لله اتحلت
ربنا ما يكتبها عليكي

زُمُرده said...

السلام عليكم
كل ده بوست طب هرد على ايه ولا ايه؟؟
ايوه ياجدعان على السكندريه
1-كل شعب فيه الكويس والوحش يعني
اجانب احترموا الجنازه واجانب سبوا رسولنا وافتروا عليه
مصريين وعرب ومسلمين تخشع قلوبهم لذكر القران وللأذان وللجنازه وآخرين حدث ولا حرج
احوال الناس مختلفه وكل واحد عنده همه وربنا يتولانا
لسه في خير في المصريين ....بس محتاج تدور عليه في قلوب الناس
2- الموت علينا حق ياريت نموت على طاعه وخير
3- اما احوار الجامعه ده فبتحصل لما الحاله تشتغل عندهم
ما هي ساعه تروح وساعه تييجي
مع انه كان اسهل باب في الدخول من كام سنه...سبحان مغير الأحوال
4-مش بقولك في عقول وقلوب عايزه اللي يلاقيها
5- بتحصل في احسن العائلات
ولو حسبتها زي ما عملت هتقفل معاك بس رزقك مكتوب ومقدر وجايلك من حيث لا تحتسب
6-اللهم صلى على سيدنا محمد وعلى آله وصحبه ومن اتبع هداه ليوم الدين
لذيذه اوي القاعده دي
ربنا يكرمك
سلام

عمر أفندى و أبووه said...


انا و انتى القدر جمعنا على غير ميعاد فى المكان ده و باللون الاحمر اللى بيعبر عن مكنون حبى و هكذا من الكلام اللى
بيثبتوا بيه البنات...

خلينا مع الصور اللى كشفته و و هو لا يعلم ان هناك كاميرا تراقبه و تراقب تصرفاته

تابع

قصة حب

عمر افندى على موقعه


www.omarafandy.com

Anonymous said...

اللهم صلي علي محمد وعلي ال محمد ... فكرة رائعه وعدد فريد من نوعه ... وتنسيق هائل بارك الله لك

رفقة عمر said...

فرج الله كربك وازال حزنك ويسر لك امرك
وجعل لك من كل ضيق مخرجا ومن كل هما فرجا اللهم امين يارب العالمين

عصفور اسكندرية said...

زمرده
نورتي المدونه
تحليلك رائع اكرمكم الله
معلش البوست كبير شويه
احنا كده
هههههههههههه
وباذن الله يوجد مزيد من قواعد الانجليزيه اللذيذه

عصفور اسكندرية said...

ابو عمر افندي
سلم علي عمر كتير
وقوله يابختك يابا
شكرا علي المرور

عصفور اسكندرية said...

منكوش باشا
شكرا علي الزياره
بارك الله فيك وطيبك و اكرمك

عصفور اسكندرية said...

رفقه عمر
اميييييين امييييييين
جزاكم الله خيرا

بنت الاسلام said...

رغم انه طووووووويل جداااااااا

الا اني ماقدرتش غير اني ااقراه كله

اولا البقاء لله في ابن عمك ربنا يرحمه

ثانيا ليه يابني الياس ده كله

ربك بيقول لقدخلقنا الانسان في كبد

طول مافيك نفس اذن انت عايش خلي عندك امل

ثالثا بالنسبة للجامعة والامن والتفتيش ده شغل سياسة ترهيب ورعب سيبك منهم وطالما في السليم خليهم يعملوا الي نفسهم فيه

رابعا الحمد لله ان صاحبك جه واهي شدة وزالت


خامسا اسلوبك زي العسل

اسمع كلام الموجه

واشرح بضمير في الفصل

ومنتظرين نجاحك

وخد بالك من اخواتك وانت بتوصلهم

اسلام رفاعى said...

محمد البقاء لله اولا
زعلان منك جدا جدا جدا
ياراجل ابن عمك يتوفى وانا اخر من يعلم بجد زعلان اوى

ياسر مدني ...دينامو الإخوان said...

الحقووووووووووووووووووني
أنا إتفصلت يا جدعاااااااااااااان