بحث مخصص

بسم الله الرحمن الرحيم

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاءَ عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا

Tuesday, April 29, 2008

لا واللي يخاف يروح
خليك في البيت
خليكي في البيت
اوعي تنزل
اوعي تنزلي

4 مايو

يوم الكرامه

اضراب شعب مصر

مش عشاني وعشانك
احنا خلاص خارج التسعيره

لا

عشان ابني وابنك
عشان بنتي وبنتك
عشان يعيشوا حياه بلا تلوث
عشان يلاقوا تعليم راقي
عشان يتعالجوا بدون عدوي
عشان يشربوا مياه نظيفه
عشان ياكلوا اكل مش مسرطن
عشان يشموا هوا نظيف
عشان يعيشوا بكرامه
عشان يشتغلوا شغل كويس
عشان ياخدوا مرتب كويس
عشان وعشان وعشان

كل دا لو قلنا كلمه واحده

لا للظلم

75 مليون لا
في وقت واحد
في يوم واحد

حنوقلها سلميه
بس مدويه
نعلن بها
عن غضبنا
عن حنقنا
عن خنقتنا
نعلن عاوزين حقنا

كله
يلزم بيته في 4 مايو
الا اصحاب الاعمال الحرجه والحيويه
الجمعه والسبت اجازه خد معاهم الاحد كمان
مش عايزين شغب ولا اي حاجه
عايزين نوصل لهم ان مارد السكوت اقوي من وحش الكلام
عشان يعرفوا ان مصر مش تركه ولا شعبها تحت الوصايه
لينا فيها اكتر منهم

ويا حبذا لو طفينا النور
في البيت وفي الدكان وفي كل حاجه
ساعه واحده طفي فيها النور
من الساعه 9 الي 10 مساءً
منها توفير للكهرباء وتوفير لمعادن الوقود ونريح فيها المولدات
ومنها ان مصر تبقي مضلمه عليهم
ساعه واحده
طفي فيها النور


يومها حتلاقي الامن المركزي في كل حته في مصر
في كل ميدان وكل شارع وكل زقاق وكل حاره وكل عطفه

خليهم
يمكرون ويمكر الله والله خير الماكريين

انا اعلنها من هنا
من مدونتي

لا
واللي يخاف يروح

من اليوم مافيش حكومه
انا الحكومه
...............
شارك معنا في جروب طفي النور يامصر
علي الفيس بوك
اضغط هنا للاشتراك

Tuesday, April 22, 2008


i will refresh to my life

F5

soon

Sunday, April 20, 2008

باي باي
سيدي الرغيف



ما تشتغربش اوي كده من الصوره
ما انتا بتاكلوا كل يوم في بيتكم
لالا مش بالشكل دا
بيبقي اصغر شويه
دا رغيف كبير ومحترم

لكن هذا هو سيدي الرغيف

اين انت سيدي الرغيف ؟
اين ذهبت ؟
miss you toooooooo !!!!!!!
كل حاجه بتكبر الا انت ماذا حصل لك ؟
اما يكفيك شربا للسجائر ؟
اما يكفيك المحافظه علي المسامير في احشائك ؟
اما يكفيك انبعاجا ً ؟
اما يكفيك 15 شهيد في سبيل الحصول عليك ؟
اما يكفيك الاقتتال من اجلك ؟
انت اصبحت فينا اغلي من الابن والولد
ظلموك وسرقوك
فظلمتنا وسرقتنا
رحمك الله ورحمنا

طوابيرك غلبت طوابير لحمه الجمعيه
يا طوابيرك يا رغيف

علمتنا الصبر والتجلد
احييت فينا الجهاد بعد موته

فعلا انت
سيدي الرغيف

فلننحي كلنا تحيه لسيدي الرغيف
وتوديعه في رحله وداعه

باي باي سيدي الرغيف


Tuesday, April 08, 2008

نجح الاضراب
فشل الاضراب
نجح
لا
فشل


هو نجح كاضراب
بس فشل كاضراب
برضه

شعب خواف ابن ستين ( استغفر الله العظيم
بس طلع فيه رجاله زي الورد
اي والله
وطلع برضه في ناس زباله طحن

علي سبيل المثال
حتكلم عن بلدي
حبيبه عيني
اسكندريه
الاضراب حقق 100% من نجاحه مع طلبه المدارس
اما في الجامعه فجامعه الاسكندريه بها اكثر من 150000 طالب لم يحضر منهم الا 1000 فقط
الترام الصفراء والزرقاء فكانت خاليه من الركاب الا مارحم ربي
الاتوبيس العام والخاص فاضي خالص
الشوارع خاليه من الماره
شارع ابوقير السير فيه ممتاز جدا
شارع محرم بيك فاضي تماما
محطه مصر خاويه علي عروشها
المنشيه بتهوي
وي كأننا في رمضان ساعه الافطار

هذا مارئيته بام عيني

المهم
المحله ولعت وزعلت عليها جدا جدا وعلي اللي حصل فيها
عشان كده مش تمام
ومش من الاضراب السلمي
لكن الحكومه بتستعبط يا فوزيه

والامن سايئ فيها اوي
دا عدد الامن المركزي يوم 6 ابريل
كان اكبر من عدد المواطنين في الشوارع
جابوهم منين دول

المهم في نظري الاضراب نجح نجاح رهيب
الانه غير منظم

وهذا طبعا امر يقلق الحكومه ويظهر قوه الشعب المدفونه

وحنشوف ايه اللي حيحصل يوم
4 مايو
اضراب تاني

يا اضراباتك يا مصر

4 مايو
happy birth day
سيدي الرئيس

4 مايو
تحيه اجلال وتقدير
لكل من فاضت روحه الي ربها في الاضراب الماضي
تحيه اجلال وتقدير
لكل من شارك في الاضراب
تحيه اجلال وتقدير
لكل من اعتقل في الاضراب
تحيه اجلال وتقدير
لكل رجال مصر وسيداتها الصامدون ضد الاحتلال المصري

واخرا وليس اخيرا اقول

يسقط الاستقلال
احنا عايزين استقلال حقيقي

...............................................
تنويه واجب
انا اضربت 6 ابريل
كاي مواطن مصري مضرب
غير تابع لاي تيار او اي اتجاه
هو حرام اني اكون مواطن مصري