بحث مخصص

بسم الله الرحمن الرحيم

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاءَ عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا

Wednesday, November 28, 2007

انا الشعب الفلسطيني

شاركوا فى قافلة غزة

قررت مجموعة من النشطاء من مختلف الاتجاهات تصعيد التحرك الجماهيرى من أجل فك الحصار عن غزة و تنظيم رابع قافلة إلى نقطة الحدود عند رفح المصرية فى تظاهرة شعبية سلمية لاستنكار اعتقال مليون ونصف المليون عربى مسلم فى هذا القطاع المجاهد وذلك يوم الجمعة القادم 30-11- 2007

وأيضا لاستنكار أن يكون الاعتقال بأيد مصرية بناء على تعليمات صهيونية وتحت مظلة تهديد أمريكية بقطع 500 مليون دولار من المعونة المهينة . وكانت مجموعات من النشطاء الوطنيين المستقلين قد نظموا ثلاث قوافل من قبل الى العريش ورفح لمساندة العالقين وتقديم الدعم لهم وللتضامن مع أهالى رفح ضد التوجه لهدم بيوتهم بناء على طلب اسرائيلى لمحاصرة الأنفاق وأيضا للتضامن مع المطالب المشروعة لأهلنا فى سيناء .

وقد تقرر أن تنطلق القافلة بإذن الله تعالى صباح يوم الجمعة القادم الموافق 30 – 11 - 2007 من القاهرة على أن تلتقى بقوافل أخرى على الطريق تنطلق من الاسماعيلية والقنطرة . وسننشر التفاصيل تباعا خلال الساعات والأيام القليلة القادمة . والدعوة مفتوحة لكافة القوى الوطنية والمواطنين الراغبين فى أداء هذا الواجب الوطنى والقومى والاسلامى وليكن معلوما أن حركتنا لن تهدأ حتى يفتح معبر رفح بإذن الله . فإما أن يحدث ذلك أو نعلن تخلينا عن مصريتنا واسلامنا وعروبتنا وانسانيتنا . ليكن معلوما أن الناس تموت فى غزة من قلة العلاج بالعشرات بسبب موقف الحكومة المصرية التى تملك اذا كان لديها إرادة أن تفتح بوابة السجن .

التجمع أمام نقابة المحامين الساعة 7 صباحاً

وعلى الراغبين فى المشاركة أو المساهمة بالدعم للقافلة وللعالقين الاتصال بالأرقام التالية :

0225327805

0235615658

0122192117

0101905062

0106832876

الرقم الخاص باهل اسكندريه
0112274878

وكانت مجموعة من القيادات الوطنية من مختلف الاتجاهات قد اجتمعت منذ عدة أيام وقررت تشكيل هذه اللجنة المؤقتة لتنظيم كافة التحركات الاعلامية والجماهيرية من أجل فك الحصار عن غزة . وصدر عنها البيان التالى :

منذ عدة شهور وقطاع غزة تحت حصار محكم تحت حجة أن حماس سيطرت على القطاع . واذا كان هذا الكلام يمكن أن يفهم صدوره من الكيان الصهيونى أو الغرب أو أمريكا ولكن لايجوز ان يصدر من جهة مصرية او عربية او تنتسب للاسلام . أن هذه اللجنة وإن كانت لاتخفى لنحيازها لخط المقاومة وانها لاتقف متفرجة على الصراعات الداخلية الفلسطينية أو على الحياد المطلق ألا أن هدفها الرئيسى هو الكفاح بكل السبل لإنهاء هذا الوضع الشاذ وهو : ابقاء أكثر من مليون ونصف المليون فلسطينى عربى مسلم تحت الحصار الشامل الجامع المانع فى قطاع غزة الذى يقوم به طرفان : الكيان الصهيونى ونظام مبارك وما يترتب على ذلك من كوارث ومآسى انسانية لاتعد ولاتحصى. بينما تمضى الحياة بصورة عادية وكأننا أمام حدث بسيط أو روتينى . حقا إن الاراضى الفلسطينية تحت حصار الاحتلال منذ سنوات وسنوات ولكن نحسب ان هذا الحصار هو الأشد والاعنف والأكثر قسوة . والمصيبة أنه يتم بأيد مصرية . بأيد الحكومة المصرية التى تأتمر بأوامر الحلف الصهيونى الامريكى .

إن الشعب المصرى على رأس كل العرب والمسلمين هو المسئول الأول أمام الله سبحانه وتعالى وأمام ضميره وانسانيته والتزامه أمام أمته والمطالب بأن يؤكد احترامه لنفسه وأن يدافع عن أمنه القومى الذى يسفح فى ذات اللحظة فى فلسطين والسودان ـ إن الشعب المصرى لكل هذه الاعتبارات ولأن حكومته هى التى تخنق الشعب الفسطينى فى غزة هو المسئول الأول عن إنهاء هذا الوضع الشاذ . وهو مايتطلب حركة شعبية منظمة ودؤوبة لفك هذا الحصار المجرم وأن لاتتوقف هذه الحركة حتى يفتح معبر رفح بين مصر والقطاع دون تدخل الطرف الاسرائيلى الذى انسحب فعلا من غزة فلماذا تعوض الحكومة المصرية عجز الصهاينة عن إعادة احتلال غزة بتولى مهمة محاصرة غزة من الجنوب . ولقد اتضح أن اسرائيل جددت اتفاق معبر رفح مع المراقبين الاوربيين دون أى اعتبار للحكومة المصرية .

وبغض النظر عن أى ظرف من الظروف فإن فك الحصار عن أهلنا فى غزة واجب دينى ووطنى وقومى وانسانى وأن الموقعين على هذا البيان يتعهدون باستخدام كل وسائل الضغط والاحتجاج الجماهيرى لإجبار الحكومة المصرية على انهاء هذا الوضع الشاذ بكل المقاييس . وإن هذه اللجنة ستظل تعمل بلا توقف لاستنفار كل قوى الشعب المصرى .

وخلال فترة وجيزة ستعلن اللجنة عن جدول أعمال أنشطتها وأنها ستتعاون مع كل اللجان المماثلة فى البلاد العربية .

وأخيرا فلنحشد كل طاقات الأمة تحت شعار :

معاً لفـك الحصار عن أهلنا فى غزة

ملحوظة : نرحب بمشاركة الأخوة الصحفيين، والاعلاميين، وتوجد أماكن لهم.

.................................

اهل اسكندريه الجدعان

تعالوا يلا بينا علي رفح نمسح دموعهم ونجدد فرحتهم

شباب او صبايا

رجال او نساء

شيوخ او اطفال

يلا بينا علي رفح لفك الحصار عن اهلنا في غزه

اتصل الان

0112274878


Friday, November 09, 2007

نسمات


استغفر الله العظيم
ايه اللي حصل بقي
الواحد بقي مشغول حبتين .. حبتين ايه .. مشغول كتير
دراسه علي شغل علي مشاكل حياتيه
الله المستعان
ليكم مني حبه همسات

1- احنا وثقافات الشعوب
يوم الجمعه المنصرم - يعني اللي فات - كنت ماشي وراء جنازه بتاعت واحد معرفه من بحري وكان بحري يومها يعج بالسياح اللي جايين يسيحوا عندنا ايشي صينين وايشي ناس لونهم احمر المهم واحنا ماشيين كان محطه الترام قاعد علي الكرسي بتاعها ناس كتير منهم اتنين اجانب واحد وواحده شافونا وبصوا علينا قام راجل صعيدي قاعد جنبهم واقف عشان الجنازه راحوا الاجانب واقفين احتراما للجنازه قام الصعيدي رافع صباعه يتشاهد راحوا رافعين صباعهم زيه
بصراحه استغربت جدا من الموقف دا
الاجانب اللي هما علي غير ديننا احترمونا واحترموا الجنازه بينما كان هناك حبه بني ادم قاعدين جنبهم ولا هزهم منظر الجنازه ولا حتي القوا لها بالا
بصيت لهم كده وقولت فين الاحساس قام رادد عليا واحد ماشي جنبي احساس مين ياعم الحاج الناس دي ماتت من زمان يابا
ماتت واندفنت بالحيا
قالي بص كده عليهم
ادي واحد شعره ابيض بس شكله شب ايه اللي شيبه اكيد لا لاقي جوزار ولا شغل
دا ميت ولا لا
وادي واحده قاعده لابسه اسود اكيد جوزها مات وموتها معاه تلاقيها دايخه علي المعاش من يوم ما مات
دي ميته ولا لا
وادي واحد نايم علي الرصيف اكيد اكيد بيته وقع وقالوا له تعالي خدلك شقه ومن ساعتها مستني الشقه
دا ميت ولا لا
يابا احنا متونا من زمان علي الاقل اللي جوا دا مات واستريح راح للي حيرحمه اما احنا متنا وقاعدين مع اللي ما بيرحمش
ربنا يرحمنا جميعا دخلنا ميدان المساجد بابو العباس ( الفاتحه ) عشان نصلي الجنازه في العصر وكان هناك سياح كتير واكترهم لما شافوا الجنازه اخدو جنب ووقفوا بدون اي حراك لغايه لما الجنازه مشيت
شألأت المرشد السايحي بتاع الفوج قالي دول واقفين احتراما للجنازه
وتشوف الناس جنبهم المصريين ولا اكن هناك شئ يذكر
اكيد الاختلاف بين الثقافات شئ مهم في تباين الحضارات والتقدم
ليه احنا كده مافيش دم خالص انعدم ولا ايه ؟
آل مصر بتتقدم بينا آل
انا عايز اعرف مصر حتتقدم بمين بالضبط
يابلد ماتت مين يصحيكي
فين ولادك فين عيالك فين شهيد سينا الحبيب
مين يضحي بدمه عشان ماتهون عليه امه
...................................

2-انك ميت وانهم ميتون
يوم الاحد المنصرم الطبيعي بتاعي بصي الصبح بدري جدا جدا الساعه 6 يعني يضوب بنام نص ساعه بعد الفجر اقوم واخد الدش بتاعي والبس هدومي واخد اخواتي البناتيت واتكل علي الله اوديهم مدارسهم اللي في ثالثه اعدادي واللي في رابعه ابتدائي واللي رايحه شغلها مدرسه حضانه مع انها مهندسه زهور وزينه واروح انا علي مدرستي اروح علي التربيه العملي لثالث سنه ليا في نفس المدرسه نشوف الطابور العسل العيال الصغيرين شكلهم يجنن علي الصبح وبعدها نقعد انا واصحابي نناكف في الموجهه عشان طريقه التحضير والكلام دا وعلي الساعه 10 كده جالي تليفون موبايل لقيت مكتوب عبدالله عصفور قولت ياربي الواد دا مايصحاش بدري كده الا لما يكون مصيبه حصلت رديت عليه وقولت خير انشاء الله قام قالي محمد ابن عمك مات قولتله محمد مين قالي محمد اللي في ثانويه عامه ... لا حول ولا قوه الا بالله العلي العظيم .. فعلا انك ميت وانهم ميتون .... مات ازاي دا يابني بيقولي وقع من البلكونه وهوا بيعدل حاجه في الحيطه بتاعتها وانتهت المكالمه
فعلا الموت ليس له سن او جنس او لون
ولا لسه بدري و لا انت صغير ولا عيش حياتك
الموت مالوش كبير الا ربك
وبعدها بكام يوم لقيت ابويا الحاج عصفور عمال يزعق ويشتمني !!!!!!! الله ايه اللي حصل دي عمرها ما حصل قبل كده لقيت امي جايا جري عليا تقولي انزل ربنا يهديك قولت لها حاضر ونزلت ... اصلي كنت واقف علي كرسي في البلكونه بركب وصله نت لاحد الجيران في الراوتر عندي
ربنا يباركلي فيهم قولو امين
ربنا اغفر لمحمد واعفو عنه وتجاوز عن سيئاته وزد في حسناته قولوا امين
..................................
3- العالم ولاد الـ...........
اسف علي التعبير السابق بس دا اخف تعبير يمكن ان يقال علي المتخلفين عقليا اللي اسمهم حرس الجامعه بعد اللي عملوه مع الطلاب في كليتي الاداب والتربيه اليومين اللي فاتو
لما تدخل الحرم الجامعي اسمه ايه يا شباب حرم جامعي
يفتشك ويفتش اللي جايبينك ويشتمك ويلعن سلسفيل اللي جابوك
تبقي تعرف انك في احدي جامعات مصر العريقه منارات العلم والحضاره في العالم
جامعه الاسكندريه اللي هيا اقدم جامعات العالم القديم والحديث
علي باب كليات الرقي الفكري والنمو التربوي كليتي التربيه والاداب
اعرف انك
حتتفتش حتتفتش
كنت ولد او بنت او حتي مخنث
حتتفتش حتتفتش
معاك شنطه او اسكتش
حتتفتش حتتفتش
في باب كليه الاداب الضابط ابن الـ .............. عايز يفتش واحد والواحد دا رفض قام ضربه علي وشه وكسر له النظاره
في باب كليه التربيه الضابط ابن الـ................. عايز يفتش واحد والواحد دا رفض قام طرده ومنعه من دخول المحاضره
والاتنين الضباط الحلوين دول ليهم حق لان الطلاب الاتنين خطر علي الامن القومي ويحملون سلاح رهيب وفتاك
انه الاسكتش او كشكول المحاضرات
عايز يفتش الاسكتش ورقه ورقه
يبقي ايه دا
ليكم التعليق !!!!!!!!!!!!!!!!!!!!!!!!!ء
.................................
4-اجتماع مدوني الاسكندريه
مدوني الاسكندريه اللي كنت اعرفهم وحسبهم دول كل مدوني الاسكندريه لقيت ان هناك مدونين اوعي وشك ناس فكر عالي جدا وراقي جدا مهندسين واطباء واساتذه جامعه ايه الحلاوه دي دا هو الاجتماع الصح للناس الصح
يعني صح الصح
احترام ايه وتبادل افكار ايه وذوق ايه وادب ايه
حسيت وانا قاعد معاهم اني قاعد في مجلس الامه لنناقش احوال البلد وننافش احوالنا حسيت ان الخير لسه موجود والناس الطيبه موجوده
بجد سعدت بلقائهم جدا وياريت يتكرر
.................................
5- قدر الله وما شاء فعل
ههههههههههههههههههههههههههههههههههههههههه
هذا ما قلته بعدما نزلت من المشروع في ميامي وحطيت ايدي في جيبي عشان اروح اجيب كارت شحن للتليفون
مالقيت ولا مليم ولا احمر ولا حتي اخضر
فين الفلوس انا كان معايا حوالي حاجه و عشرين جني
ياربي انا ركبت المشروع من سيدي بشر ودفعت ربع جني وحطيت باقي الفوس في الجيب
طب ايه العمل ماعيش فلوس اروح ولا فلوس اتكلم في تليفون وحتي الرصيد نفد وكمان الخيبه رسايل كلمني شكرا مافيهاش غير رساله واحده واللي انا مستنيه اتأخر عليا
قولت الرب واحد والعمر واحد
وبعت الرساله الاخيره دي للي انا مستنيه وقولت امري لله
واستنيي ولاحياه لمن تنادي
اعمل ايه ياربي بيتي بعيد جدا عن ميامي ولو مشيت لغايه البيت يبقي حوصل علي بعد بكره
فجأه لقيت تليفوني يعمل فايبريشن قولت الحمد لله فرجت ومسكت التليفون بايدي ثابته ونفس واثقه مما تفعل وضغطت بقوه علي زر الرد واذا بي اقول السلام عليكم الووووووووووووووووووووووو
ولكن لاحياه لمن تنادي
الشبكه مشغوله
فقدت الامل في البشر ووشوشت نفسي اكيد الامل في ربنا
بصيت في السما وقولت يارب ونزلت راسي لقيت اللي انا كنت مستنيه قدامي بيقولي بخ
بصراحه كنت حقتله بس حمدت ربنا انه جي وخلصنا مشوارنا وروحت طبعا علي حسابه

ذلك فضل الله يؤتيه من يشاء والله ذوالفضل العظيم
.................................
6- IF
قاعده ايف بالعربي

ايف يو ونت بي هابي .... يو ماست صلي علي النبي

Thursday, November 01, 2007

ركز ولاحظ

هناك عدد من الاختلافات بين الصورتين
اكتب الاختلافات اللي تقدر عليه



تسلم الاجابات في موعد اقصاه
لما ربك يسهل